Riazor acolheu a apresentaçom dos actos de Siareir@s para o dia 27

Dezembro de 2008

 

Siareir@s Galeg@s ofereceu na manhá de ontem umha conferência de imprensa no Estádio Municipal de Riazor com o objectivo de apresentar perante os meios de comunicaçom a campanha gráfica “Direito a competir, direito a decidir” e informar dos actos programados para este dia 27 de Dezembro na cidade da Corunha.

 

O colectivo explicou que a legenda escolhida este ano voltava vincar na ideia da oficialidade das selecçons nacionais galegas, “principal razom de ser de Siareir@s Galeg@s", segundo exprimiu o porta-voz do colectivo na sua intervençom.

 

“Neste País nom só temos o direito senom também a vontade de luitar pola oficializaçom das nossas selecçons”. Aliás, “a oficialidade nom é nengumha ilusom”, acrescentou, e relembrou como Fernando Vasques manifestara a sua convicçom de que a Galiza poderia algum dia jogar a nível internacional em campeonatos oficiais.

 

Para além disto, Siareir@s informou da intensa actividade e trabalho que leva realizando nos últimos meses e dos actos que este sábado terám lugar na Corunha.

 

A organizaçom tem preparado um variado leque de actividades. Às 16 horas, em colaboraçom com a associaçom cultural os Curriolos da Pescaderia e com o apoio do Concelho da Corunha e dos negócios de hotelaria do Orçám, haverá um passa-ruas com o quarteto de gaitas da Gentalha do Pichel e com dous regueifeiros bergantinháns. Às 19 horas manifestaçom desde o Campo da Lenha para exigir o direito da Galiza a competir a nível internacional e após o jogo, por volta das 23 horas, concerto em apoio à oficializaçom de Trapalhada, Skacha, Lamatumbá e Tonhito de Poi no Frontom de Riazor.